NEPALI POEM NIMANTRAN BY TARUN KHALING

निमन्त्रण

Tarun Khaling

तिमी समाज सेवक हौ भने
मेरो शहर हुँदै आउनु
भिखारीहरू सुतेका 'फूट पाथ' हुँदै आउनु
मलाई भिखारी र पागलहरूसित भेट्ने छौ |
हिज-आज,
म अस्वस्थ्य धुकधुकी खोज्दै हिँडिरहेको छु |
शहर होइन भने
सनार्थीहरूको जंगल हुँदै आउनु
त्यतिबेला म घाऊहरु सेक्दै
बसिरहेको हुनेछु |
तिमी बिना चिन्तित आउनु, स्वतन्त्र आउनु ,
म तिमीलाई विदेशीको लाञ्छना
लगाउने छुइन |

तिमी कवि हौ भने
हाम्रो भेंट कवितामा आवश्य हुनेछ
तर तिमी,
कवि पनि राजनेता पनि हौ भने
मेरो देशको,
मेरो राज्यको ,
मेरो जन्म-ठाउँको
माईली दिदीको रक्सी पसलमा आउनु
जहाँ म मातेर विहोश
बान्ता गरिरहेको हुनेछु--
त्यतिबेला हुनेछ
तिम्रो र मेरो माटोको कुरा |